Voninkazo (HRV)

Voninkazo anie ny foko,
Nifono hanitra fitiavana :
Rehefa nohitsahinao
Dia namoaka fofo-manitra
Zary nanenenanao.

Na dia foinao ity tenako,
Torotoronao ity izaho,
Ny avelon'ny fitiavako
Feno hanitra talaho
Dia vao maika hamerovero
Ao anatinao ao.

Ilay izaho anefa dia ho potika,
Eny, ho faty sy ho rotika
Eo ambany tongotrao
Ka tsy hiarina intsony
Na hiverina aminao.

Ny solofoko raha hisy
Izay tsy mba voahitsakao
No hitsimoka mangina
Sy hamony vaovao.

Dia ho voninkazo indray ny foko
Hifono hanitra fitiavana :
Raha hohitsahin'ny tontolo
Dia vao maika hamerovero
Mbola hamoaka fofo-manitra.

HRV
--------