OHABOLANA (Kintana)
Pas encore lu
(Nalaina tao amin'ny vetso.serasera.org)
Ny mason'ny olona tia zahazaha,Fa be randram-bao eto ambonin'ny tany,
Nolalodalovan'ny sasany angaha
No be vetsovetso rahavako izany?
Rehefa tsy tiana, Ralala, dia tsory,
Raha tofoka, hono, tsy fondro na tsiny,
Tsy atao lolom-po enti-maty tsy akory
Satria ny fitiavana, rano an-tsiny.
Tovozin'ny ora, sekondra, minitra,
Taterin'ny andro, ka farany, ritra :
Mba disaka, hono, satria ela ny ela,
Ka faikam-pitiavana sisa tavela.
Veloma, Ralala, raha tsy ho tamana,
Fa manana ny elany izany tsiriry :
Manifika rano, dia miova fitana
Vahiny mandalo, tsy monina firy.
Masoandro ririnina mantsy ny saina,
Ary koa tandrok'ondry ny fo sy ny fanahy;
Ka ratsy hariva izay tsara maraina.
Satria miova lava ny fon-dehilahy.
Ny raviny akory tsy mbola malazo
Dia lasa vovohina mantsy ny hazo;
Ny voady natao, vao omaly ny omaly,
Dia miova ho angidina izany voangaly.
Ry lamba natao hifonosako maty,
Ka vao nosasana, dia rovitra ho azy,
Fitiavana fotsy fa mainty ao an'aty,
Nataoko hitokiana, ka hay vazivazy.
Horirika mantsy, ka nataoko ampinga,
Harefo, ka nataoko tehina, indrisy,
Sodokam-pitia aho ka nino lainga,
Nangaina, satria nanantena tsy nisy.
Veloma, ry vato natao hiantefana,
Fa hay honahona nandentika kosa,
Nataoko ho mpiambina akoho an-tanàna,
Kanefa papango nanampy ny fosa.
Nataoko hanorina, kanjo nandrava,
Natao ho fanafana, kanjo namono :
Nataoko ho soa nampidirina am-bava,
Kinanjo dia poizina fa tsy ronono.
Nataoko ho tanan'ny mpanafosafo,
Ka hay lefom-pohy nandratra ny foko;
Ny rano tokoa no nivadika ho afo,
Matoa izany tsiky manjary toloko.
Veloma tsy fidiny, hono, ralala,
Fa ho afaka ho aiza ity ikala tsy tiana;
Misaotra mivavaka anie ikala adala
Ka miantso ny fasana, fara-fodiana.
Ry fahafatesana, mpamonjy irina,
Ry lavaka mainty, ry fasa-mangina,
Raha toa niely patrana izay efa vory,
Tsy fahasambarana ve ny matory?
Lazao an'i dada ny feoko ho reny
Fa satriko ihany tsy miandry fotoana :
Tsy aleoko ve mandry eo akaikin'i neny,
Toy izay hitomany fitia efa foana?
KINTANA
(Ny telegrafy, n° 215, 08 janvier 1929.)
--------
Lien: