NY HAJAN'NY FOKO (RAKOTOSOLOFO Jean Emile)

1 - Ny hajan'ny foko madio ranoray,
Haingo sy ravaka soa tafaray
Karatra ho entiko rahatrizay,
Hidirako any an-danitra mandrakizay.

2 - Ny hajan'ny foko mamiratra soa
Ambenako mba ho voahaja tokoa
Ifonako kosa ny ratsy taloha
Fa sao tsy mitsena ny Tompo Jesoa.

3 - Ny hajan'ny foko madio tsara indrindra
Ambenako sao dia solafa-mamindra
Ny lalan-kizorako ataoko mirindra
Fa sao tsy mahita ny Tompo Avo indrindra.

4 - Ny hajan'ny foko madio aok'izany
Arovako tsy ho voafitaka hatrany
Mandram-pialako eto amin'ny tany
Ny foko rehetra any an-danitra ihany.

5 - Ny hajan'ny foko madio sarobidy
Ambenako mafy fa 'ndrao mibolidy
Feheziko tsara tokoa ny safidy
Ny vatako asiako kofehy lamboridy.

6 - Fefeko ireo masoko ireo tsy hijery
Ny zavatra fantatro fa mahavery
Aleoko mikipy na lasa miery
Toy izay dia himbanjina loza mahery.

7 - Ny tenako kosa dia arovako tsara
Mba tsy ho rebireben'ny Satana
Aleoko mandefitra manao ny tsara
Toy izay dia ho very rehefa any am-para.

8 - Ny vavako tsy avelako hiteny
Ny zavatra ratsy rehetra toy ireny
Ny marina ihany no ataoko fiteny
Fa sao tsy misantatra ilay Zatoheny.

9 - Ny foko herezo hanaraka Anao
Manomboka hatreto amin'izao tany izao
Mba tsy ho diso amin'ny lala-makao
Amy Jerosalema ilay vaovao.

10 - Ny sofiko kosa tsentsemako mafy
Rehefa tonga ny resaka ratsy mifafy
Aleoko mikipy na lasa mihafy
Toa izay voasokentan'ny demony ratsy.
--------