Ny any aminay (Andriampanarivo J. D.)

Injany lamako sy hiran-kilonga
Manakoako arahin'amponga
No re any ho any,
Fa inona izany ?

Ankizy mivory. Jereo ny ataony :
Manao boribory, ka ny eo afovoany
Misikina lamba
Tsy mihambahamba.

Itehafan'ny zandry dia mihodina mora,
Manao tsipy sandry eo anivon'akora ;
Ny sorony roa
Mandihy avokoa ;

Mamindra mitsaikona toa ketraka ila,
Somary mikainkona fa jilajila,
Mihodina tampoka
Ary indro mitsatoka.
Mitehin-kiho, midola ny loha...
Mba dinidiniho, mbola tsara tokoa !


Fampitaha, laharana faha 24, 1965
--------