ADY AN-TRANO (Fredy Jaofera)

ADY AN-TRANO




Jereo ny firenena
fa mampahonena,
mampivarahontsana
no nahontsankontsana,
ka tonga ady an-trano
nidiran’ny angano !



Samy Malagasy
dia nisy poa-basy,
nisy rà mandriaka
fa leon’ny politika ;
leon’ny zava-mafy
sy ny mbola hihafy.



Mpiray tanindrazana
dia ady re no tazana,
fa ny fandeferana
na izay fiheverana
ho an’ity vahoaka
tsisy mba nivoaka !



Mpiray Nosy ihany
dia nifamely izany,
fa izay fihavanana
tokony ho notànana
nivadika ho fahoriana
sy tototra hakiviana.



Fredy JAOFERA
--------