NY FANAMBADIANA (Fredy Jaofera)

Ny fanambadiana dia zavatra masina
ka tandrovy lava izay hanajana azy ;
manonja fitiavana toa ranomasina,
tsy atao kilalao na koa vazivazy .



Ny fanambadiana dia zavatra harena
mba notolorana hahatsara firindra,
koa aza hadinoina ny voady nekena
f’efa natambatra hiaraka hamindra.



Ny fanambadiana dia zavatra lalana
tomefy adiady sy ‘reo fifanoherana
ka ataovy izany tsy ho hita mibahana
fa mainka hampijoro fifandeferana.



Ny fanambadiana dia zavatra Anjara
efa noforonina hampiray tarigetra,
sady ny hahazoana dimby aman-para
hanome hasambarana tsy misy fetra.



Fredy JAOFERA
--------