TOMPO O ! (Fredy Jaofera)

TOMPO O !




Henoy ange vavako
atolotro ho fitiavako
sy ataoko firariako
ho an’ilay olon-tiako,
nandratra fa tsy foiko
sy mbola antsotsoiko !


Tantano hatany hatrany
tsy ho potraka amin-tany,
tsy hitsetra velively,
na sanatria mba kely,
fa hihirahira foana
ho lavitry ny saona !


Ry Tompo sy Mpandahatra !
Tiako mbola hitsahatra
ny eso izay nomeny
sy ny latsa zary teny
nanindrona ny foko
nahakivy vao nisoko.


Enga anie, ry Ray,
ho tanteraka amin’izay
‘zao vavaka mangina
tsisy intsony ampiana…
Ho Anao anie ny Laza
sy ny Dera izay sahaza !
Amena !



Fredy JAOFERA
--------