VAVAK'ILAY POETY (2) (Fredy Jaofera)

VAVAK'ILAY POETY



Ataoko ahoana moa, ry Ray,
no tsy hisaotra Anao indray
tamin’ireny andro maro be
feno tsiky vao mandeha ?



Ataoko ahoana ny hanadino
k'inty ny saiko re vimbino,
inty ny foko re mba ento,
na dia lavitry ny sento ?



‘Reny oram-batravatra,
toa nikija sy nandratra,
mbola ataovy fifaliana
tsy hahitako fijaliana.



‘Reny ora nampangidy,
tsy mba tery na safidy,
mbola ataovy varavarana
hahitako fahasambarana.



Ry Tompo ô !...Ongoty
ny alahelon’ny kamboty
ka enga anie ‘zay faniriana
ho tanteraka mangina.



Ny mahantra sy ny ory :
tsy miadan-tsaina akory,
ka tsinjovy lalandava
mbola hahita ny mazava.



Andriamanitra ô ! Tahio
'zato fiainako eto anio,
ho Anao anie ny Laza
sy ny Dera izay sahaza.



AMENA


Fredy JAOFERA
--------