Vaky ny ady! (Mahefa Randriamiarisoa)

Tsy mahasakan’ahy tsy hifaly raha ny halaviran-tany
Tsy mahatohitra ny foko, tsy hitepo haneho fitia,
Raha ny lanjan’ny tomany tsy hampiova, sanatria
Ny herin’ny fanantenako : Izay no aingako aty.

Raha ‘zay vola tsy ampy lava no haha-ketraka ny saiko,
Raha ‘reo olon-kirian-dava no hampiferotra ny aiko,
Dia hanjary zava-poana, ‘reo sorona sy fihafiana
Nentiko nanangan’ady taminao rafahoriana.

Ianao koa rafahantrana, miomàna ny ho kamboty
Fa handao anao tsy ho ela ireto havanao mahatoky:
Dia ny fisalàsalàna, hakamoana, fanao ratsy,
Ho avy handalo fitsaràna, ho voaheloka ho faty.

Mitsangàna ianao raha sahy ka tohero ny hambom-poko,
Avy aty raha lehilahy sahia mandà ny fandrosoako,
Satria raha ny amiko no heverina, maty paika ny rehetra
Roso ‘ty ka tsy hiverina, fiadanana no fetra!



Ma-F
--------