SAINA (Mbiou)

Entaniko ianao, mba hanangana SAINA.
FOTSY MANJOPIAKA taratry ny maraina:
Mandry fahalemana, anaty firaisan-kina,
Mitovy fijery, tsy maneho fiamboni(a)na.

MENA MIDOREHITRA, hanehoana ilay fitiavana,
Hanomezan-kasina ny rà nalatsaky ny razana.
Ilay niady sy nitaky, hahazoana fahafahana.
Hahaleo tena, tsy hisy intsony fanjanahana.

Ary MAINTSO MAVANA , toy ny atin'ny ala,
Endriky ny tontolo, sy ny fanantenana.

Ka taomiko ary isika, iangaviko re ianao:
Mba fotsio hanjopiaka, sy aredaredao,
Mavano ihany koa, ka hihavao hihasoa.
Ilay Tanindrazana malala: Madagasikara soa.
--------