SARINAO... (Andraina Arisetra)

Ny sarinao iondanako
Iny no mba namako
rehefa toy izao, embona any lavitra any...
Miarahaba indray ny saiko ny tsiaro izay nitany
ka momolaka vinany misamboara anatiko ao
Mby ho tody any aminao...
Dia... nofihiniko mangina
ato an'alim-pitoniana
ny sarinao niriko, ho vatana eo imaso
Indrisy!!! Fiainam-peno ankaso...!!

Lala!!!! tsy sarisary ny ao
fa kitsiarotsiaro anao
no lasa za-panao, mirindrina ato anatiko
Mirongatra mandrangotra ka tonga toa tsy tantiko...
Any ianao ilay tena izy, izay notiaviko, nekena...
Fa... ny sarinao ho fihiniko dia ampy hisolon-tena,
manakaiky indray ny foko
Tiko ianao ka toa tsy foiko

Andraina Arisetra
(Kayrah)
02/08/23
--------