misy (dodanina)

Mbola tsisy niantsa

Hangataka antsa
(Nalaina tao amin'ny vetso.serasera.org)
Misy olona any, , ,

Misy olona any tiako noho ianao
Fa tsy nambarako azy fa misy izany ianao
Fandrao ho tezitra izy ka ho potika ny anay
Ny fitiavako azy mafanafana vay
Ka naleoko tsy niteny sy tsy nanambara
Fa izaho sy ianao manana tantara


Misy olona any tiako noho ianao
Fa aza manontany ny fitiavako anao
Fa izy no taloha no sady ankehitriny
Raha babony ny foko aza omena tsiny
Ekeo fotsiny hoe : izay aloha ny androany
Aza malahelo ary aza mitomany


Fa tany am-piandohana , tsy sahiko lazaina
Ny aminay sy izy , ninia tsy tantaraina
Na dia tsikaritrao tamin’ny fihetsiko tsy nahy
Fa izy anie ilay ‘IZY’ , izy anie no ahy
Dia hoy aho taminao : “ mpinamana izahay”
“Mpifankalala be efa hatramin’izay”


Dia nisy anefa “ ianao “ , dia nisy koa “ isika”
Na dia tsy toa nafana fa somary nangatsiaka
Ny fitiavako anao raha oharina amin’ny azy
Zary kilalao , angamba vazivazy
Na izany aza tsy sahiko nambara
Fa izaho sy ianao manana tantara


Dia notantaraiko anao ny fiainanay taloha
Mitohy hatramin’izao voalazako avokoa
Tsy sanatria akory kinia hankarary anao
Fa tsy tanako ny foko hanambara izao sy izao
Ka aza omena tsiny f’ izay rehefa tia
Raha ny faniriany hiaraka ho doria

Dia izy no itokiako , izy no atahorako
Sady fifaliako no sady koa fatorako
Dia tsy afaka aminy ny saina amam-panahy
Ka na lavitra aza izy tsy ananako ahiahy
Fa mafy izany fatotra mampiray anay
Fitiavana efa matotra ny fitiavanay


Fa naninona aza anefa no nisy koa ianao?
Naninona aho no resy teo imasonao?
Ianao lay be lalao sy maro vazivazy
Ny fitavanao tsy oharina amin’ny azy
Ny halaviran-tany manginy ihany koa
Kanefa nisy izaho sy ianao , nisy isika roa


Dia nafeniko azy , nafeniko azy ianao
Tsy aminy irery fa amin’izao tontolo izao
Ianao toa tsy itokiako na dia fifaliako
Ianao toa mampanahy na dia mahafinaritra ahy
Ianao toa be safary no sady tsy mitsotra
Fitia toa hankarary ny fitia mipololotra


Fitiavam_bao omaly , mankadiry hono androany
Ahoana no inoako fa marina an’izany?
Dia izay no averimberina sy ataonao litania
‘Tiako ange ianao” , “ Tiako ianao Chérie”
Fa raha tia ahy ianao dia aza manontany
Ny fitiavana vaovao tsy atakaloko ny any


Tianao ho fantatra isan’andro izao ny fitiavako anao
Valiako an’ankamantatra , amin’izay tsy fantatrao
Fa izaho tsy hanambara toy ny amin’azy izay mba ato am-poko
Na hitomany ianao , na hamazivazy , na koa hitoloko
Fa na ny tenako aza angamba toa tsy mahalala
Fa iza ange no tiako : “Ny hendry” sa “’Ny adala” ?
--------
Rohy:
Sokajy : Aingam-panahy
1694 1
Hevitra mandeha
tititiana ( 11/12/2005 02:38)
Mahafinaritra ny tononkalonao ary toa mahita ny zvt hiainako ankehitriny ao anatiny aho. Ka tandremo ary sao fantan' ilay lavitra ny fisian' ilay iray ary mahaiza misafidy izay tena tiana sao hanenenana. Tititiana
fiaritiana ( 11/12/2005 10:13)
tsara be ny tononkalonao,zavatra misy mihitsy izany nefa marina ny tenin i tititiana hoe ataovy ny safidy ary na ho ela na ho haingana tsy maintsy fantatry ny iray ihany ka mahereza ary e!
fiaritiana
Hametraka hevitra
Midira aloha
Momba ny tononkalo
Mpanoratra : dodanina
Nampiditra : dodanina
Daty : 08/12/2005 08:35
Antsantononkalo

Mbola tsisy niantsa

Hangataka antsa Hampiditra feo
Tononkalo hafa
© Eugene Heriniaina - serasera.org 1999 - 2024 - page load 0.0093