ANATY NOFINOFY (Elysé Azrael)

Anaty nofy mamy, misy nosy iray
Nofisiko mazàna fa hoe tontolontsika,
Tontolo nofinofy, fa nofy mba voaray
Ho ampaham-pahasambarana amin'ny tontolo tsy hita..

F'anaty nofinofy, libra ny foko,
Libra tanteraka: afaka manidina,
Afaka mandresy ny sento sy toloko,
Any amin'ny avo indrindra ny fanahiko vao midina...

Anaty nofinofiko, misy ilay zaridaina,
Zaridaina miafina tsy hitan'ny mpahita,
Ao no manamaivana ny sorisorin-tsaina,
Ao no tonga lafatra ny hasambarantsika...

Anaty nofinofy, tontolo tsy mampino,
Ny andrefana, atsinanana, avaratra, atsimo,
Mamiratra diamondra, mamerovero hanitra,
'reo kintana mandravaka ny alina eny an-danitra...

Anaty nofinofy, raha toa ka sitrakao,
No hanorenantsika ilay akany mamy,
Fa tsisy maharava izay voaorina ao,
F'anaty nofinofy, tsy resin'ny eto an-tany...

Anaty nofinofy, nofinofy iray,
Ao no aorintsika ilay mandrakizay,
Anaty nofinofy isika no miray,
Miray anaty nofy, miray am-panahy:
Satria izaho nofinao, ianao koa nofy ho ahy!....
--------