You are here: home > Vetso

AO ANATY... - Fredy Jaofera

Azo vakiana?


AO ANATY...



Ao anaty feo miranga,
andrenesam-pifaliana,
misy antso tena manga
antenaina tsy zovina.




Ao anaty 'tony maso,
misy jery lalandava
tsy mitady ranomaso,
mahamirana ny tava.




Ao anaty fo mitia,
misy toky makadiry
tsy mamely, sanatria,
vao indro fa mitsiry.




Ao anaty 'tony saina ,
misy tsiaro tsy tafala,
misy nofy noderaina
any ihany sy mijoala.




Fredy JAOFERA