MALAHELO AHO (Fredy Jaofera)

MALAHELO AHO




Malomaloka ny ety Ambohipanja
ka tsy vita izay tokony hatao ;
ny fiainako no tsy ampy lanja
fa 'zany foko no lavitra anao.



'Reo andro mikotroka lava,
mangeja no sady misaona ;
ny foko tsy mahita mazava,
maniry na te ho any foana.



'Reo vorona mody miery,
mihira no mba mikorana
fa izaho no singany irery
fa tsy eo ianao manafana.



Tomany no latsaka ho azy
indray, indroa, in-telo !...
Tsy laingako na vazivazy
fa ny fo no mba malahelo.




Fredy JAOFERA
--------