MORA TAMINAO (Fredy Jaofera)

MORA TAMINAO



Mora taminao no nanafoana teo tokoa
'zay efa tsangambato mafy sy tsy roa ;
mora taminao ka nilaozana avy hatrany
ny fo mbola nitady fitiavana tsy lany.



Mora taminao no namitaka ahy ombieny
rehefa orana nikija no nanakotsa teny ;
mora taminao ka tsy nohenoina intsony
'reo alahelo maro tsy tsapa ho nitony.



Mora taminao no nanitsakitsaka ny vita
sy namotipotika avy izay rehetra hita ;
mora taminao ka indro fa nisintika,
niova olon-kafa mody toa nibitaka.




Mora taminao izany lasa tsy nahatsiahy
sy tsy te hahalala ny nahazo ny fanahy ;
mora taminao ka nosoloina avonavona
'rony toetra mendrika tonga nanjavona.




Fredy JAOFERA
--------