NY VIDIN'NY RANOMASOKO (Fredy Jaofera)

NY VIDIN’NY RANOMASOKO





Ho tsapanao etoana rehefa hijaly sy hanenina
ny halafon’ireo tomany tsy tanty sy nafenina ;
ny vidin-katezerana mbola mila nankarary
kanefa dia fitiavana efa hita ho nihary.




Ho takatrao ihany rehefa ho ory lalandava
ny lanjan’ny voateny toa maty sy efa rava ;
ny zoron’ny eritreritro nahatsiaro sy nikasa
kanefa tsy haiko loatra fa nivadika sy lasa.




Ho azonao ombieny rehefa iny ho potraka
ny herin’ny fitiavako mafy sy tsy motraka ;
ny hahavesatry ny sento saika nanadala,
nentiko mangina no nitombo sy tsy niala.




Ho fantatrao ery rehefa hivaky sy ho tara
ny trosa izay nilaiko tiako mbola ambara,
ny refin’ny habakabaka tsy hita ho hatraiza,
nanodina ny “ ISIKA” sy tonga mba nitaiza.





Fredy JAOFERA
--------