RAOELFIA (Fredy Jaofera)

RAOELFIA



Iza moa iny olona mijaikojaiko,
mamingavinga no mibaikobaiko ?
Iza moa iny fa tsy tiako im-polo
fa manaratsy no toa vorondolo ?


Iza moa iny fa toa tsy mitafa,
tia miavonavona no hafahafa ?
Iza, ho'aho, iny fa ratsy fanahy,
mieboebo ka mahasosotra ahy ?


Iza moa ity tsy mahataho-tody
manosihosy sy mikapoka atody ?
Iza moa fa mankarary hatraty
sa izy tokoa no Raoelfia ?


Andraso fa ho avy ny farany,
hahamoana ny tena tantarany,
hahalalany fa ny zavatra atao,
misy fetra sy mety mandao !




Fredy JAOFERA
(1985)
--------