RY DADA (Fredy Jaofera)

Mbola tsisy niantsa

Hangataka antsa
(Nalaina tao amin'ny vetso.serasera.org)
RY DADA





Tsy sanatria hamohafoha irony lasantsika,
Tsy sanatria hitanisa irony andro nibaliaka
No ijoroako eto an-doham-pasana, ry Dada,
Fa hitondra sentosento sy teny mibadabada.



Sentosento hoy aho, ary sentosento mankarary
Sentosento malahelo ka tsy mendrika ho fanary;
Mandria am-piadanana f’ireny lasantsika ireny
Voarakitra ato am-poko sy nampitsiky lavareny.



Toa fijaliana ity no mamelombelona ato anaty:
Alahelo hafahafa sy tsy hadinoina mandramaty;
Ontsa aho kanefa mbola ho avy ilay maraina
Hanaposaka ny mamy sy hanafoana ny taraina.



Mandrapihaona aloha no tiako ho fara teny,
Lasa ny eritreritra ka tsy mitsahatra manjeny;
Mandria am-piadanana fa na mafy aza ity fahoriana,
Raozy mena sisa no atolotro sy ranomaso mikoriana.




Fredy JAOFERA
ILAFY,1 Novambra 1983
--------
Rohy:
Sokajy : Alahelo
1234 0
Hametraka hevitra
Midira aloha
Momba ny tononkalo
Mpanoratra : Fredy Jaofera
Nampiditra : 3004
Daty : 25/04/2007 09:36
Antsantononkalo

Mbola tsisy niantsa

Hangataka antsa Hampiditra feo
© Eugene Heriniaina - serasera.org 1999 - 2024 - page load 0.0101