TSAROVY (Fredy Jaofera)

TSAROVY





Tsy ao an-tsaiko akory ny hamaly ratsy anao,
Na nahaketraka ahy hatrany ny vava mankalao,
Na tsy tanty mora etoana ny latsalatsa sy ny fosa,
Mba nataoko ho rediredy ka hay tsy izany kosa.


Tsy ao am-poko akory ny hanala ilay fitiavana
natokako ho anao zary hitombo tomandavana,
zary kalo tena hohiraina sy hipetraka ho doria
ho porofo manambara fa tsy niova ange ny aty.


Tsy ao am-bava akory raha ny hanompa sesehena,
Na tsy levoko avokoa ireo nolazaina sy nomena ;
Fa ny Avo irery ihany no mba mahita sy mandre
Ka mbola hamaly mafy anao n’aiza n’aiza aleha.





Fredy JAOFERA
--------