Tsiaro an'i Rivo Ramandiamanana (Hasina ANDRIANARIVO)

Fahatsiarovana an’Itompokolahy Rivo Ramandiamanana
Mpamoron-kira - Mpampianatra mozika
(20 MEY 2012 – 20 MEY 2013)


1-Mitsingerina androany ilay androm-pahoriana
Izay nandaozany ity tany, niaretam-pijaliana
Alahelo sy tomany, niharo sento tsy hay lazaina
Toa tsaroako toy ny omaly, mitamberina ao an-tsaina.

2-Fa ny ratra lalim-paka no nidona tao anaty
Nampilofika tsy hitraka, raha vao nahare hoe... “maty”
Mafy indrindra, tsy nampino, fa nangidy izy izay
Nefa kosa tsy adino fa dia lahatry ny Ray.

3-Fandalovana ihany, raha ny fiainana eto an-tany
Ka na tsiky na tomany, dia isaorana Azy hatrany
Fa fitiavana tsy miova, no nomen’ny Tompo izao
Dia anjara soa sy lova, izay mitoetra tsy mandao.

4-Hoy ny Tompo : matokia, mbola hisy andro mirana
Hoy koa Izy hoe: mifalia, fa Izaho no hisahirana;
Tsy hamela anao ho irery, na kamboty ts’hisy mpiahy
Fa ianao tsy foiko ho very, mahereza aza manahy.

5-Ny eto ihany no mifarana, fa hihaona rahatrizay
Ka hahita fahasambarana, ireo maty ao amin-dRay
Tsy hisy intsony ny alahelo, tsy hisy intsony ny taraina
Fihobiana hamelovelo, Andriamanitra ho deraina

6-Fanomezan-tsy hay tononina, no omen'Ilay Tsitoha
Dia Fanahy mampionona, mampandresy tsy hikoa
Izay mitaiza, mampahery ny finoana mba hijoro
Ka Jesosy Ilay Mahery no miaro tsy hikoro

7-Dia izay ilay vetsovetso, nokaloin’i faravavy
Na anio aza misento, dia hitraka amin’ny ho avy
Tsiahy ihany araka izany an-dRamandiamanana
Zay niverina ho tany ka matory am-piadanana.


Hasina ANDRIANARIVO © 2013
--------