Ialahy leitsy izany (Heriarilala Andriamamonjy)

IALAHY LEITSY IZANY A

Sombinaina tokana n/mitia no sady tiana.
Hany nisakambina tamin’ny lalana mangina
sady koa nitantana teny an-dalambe,
tsy nahalala henatra, na taiza koa naleha !

Sombinaina ravaka, haingo fanao renty !
Tokana miavaka, satriko hoentina mitety
ny tany rehetra diaviko sy lalana fombàko.
Tsy foiko hampahalalaina ny rehetra hadalako.

Sombinaina mamy tsy fananana iombonana
Nirina koa hiray dia amin’ny lalana hizorana
dia entina am-bavaka apetraka amin-dRay
fa izy no mahalala ny mahasoa ny tsirairay.

Ialahy leitsy izany a ! Inoako ialahy fa ao.
Tsy misy fanekena na voady efa natao.
Fa ny fitia hatreto no mbola mena midorehitra
Ny fo na manantena dia aoka aloha tsy hiantehitra.

Sombinaina tiana, omeko hery hatrany
Fadio amin’ny fiainana ny miambozona tomany
Ny fo mitepo hamy tsy tokony hankahala
Izay no teny kely avy amin’IARILALA .

(Mbola hitohy)
HERIARILALA 13/11/2021
--------