You are here: home > Vetso

Nokasaina - Ilay Valahara

Azo vakiana?

……………..Nokasaina…………….
Anaka,
Tsy dada akory no faly hampihanta
raha manome anao izao rehetra izao
fa tsy tiako ianao hitsiriritra ny an’ny hafa
kanefa izaho mbola mahavita izay azoko atao.
Aleoko mihitsy izaho no miaritra ny mafy
toy izay ianao no hiafiafy
amin’izay rehetra ilainao.
Tanjoko dia izao :
Tsy maintsy tafita ny zanako
Ka na hiempaka aza ny tanako
dia ho sanatriaviko ny hitaraina
noho ianao ry sombiniaina.
Na mafy aza ny ady,
dia izao no ataoko fanamby :
« Vonona aho hisedra  na tanam-bokovoko
na  tongo-bakivaky. »
Tsy ho zakako mantsy  ny hamerina an-delanao
ny mangidy izay efa nosotroiko.
Tsy ho tantiko mihitsy  ny hahita ny tenanao
hisaringo-borodamba maloto.
Fa tsy maintsy ho katsahiko ho anao ny fahasambarana
saingy izao no mba fangatahana :
Ho sasa-poana ihany dada
raha toa ianao tsy hanaja
ireo hafatry neny fony fahavelony.
Tazomy ireo tsiambaratelony,
Tano mafy ny fahendrena
dia  ho tanteraka ireo rehetra izay efa  nokasaina.
                                                          Ilay Valahara

Sokajy : Fianakaviana

Mombamomba

Mpanoratra : Ilay Valahara


Nampiditra : Ilay Valahara
Daty : 20/10/2017
Mpamangy : 542
Mankafy : 1

Tononkalo hafa

Miara-tsy mila