FAHAZAZA (Jean Jacques RABEMILA)

Fahiny, fahazaza, raha tany ambanivohitra
Miara-mikarenjy amin'ny fody sy sorohitra ;
Miaraka mifoha amin'ny fitatra sy goaika
Ka mifarimbon'asa amin'ny mpiasa tany maika ;

Rehefa antoandro ny andro, mila tsy hahomby,
Ilaozana ny angady, dia lasa miandry omby,
Ka manariva andro mamandrika kibobo,
Papelika, tsipoy, anaty lobolobo ;

Na raha tsy izany indray, dia lasana manjono,
Misaka marakely na orana hatono,
Ery an-doha riana, ka loza indraindray
Fa tompondrano lava ny orana voaray !

Rehefa hariva ny andro izay vao lasa mody,
Miaraka amin'ny omby, ny arosy mbamin'ny fody,
Fahiny fahazaza raha tany ambanivohitra,
Ka niara-nikarenjy tamin'ny fody sy sorohitra.

Jean-Jacques RABEMILA
--------