AMIKO ( Album Aina Nafindra ) (MIRA ANDRIAMAMPIANINA)

AMIKO

Amiko ny Ray
Mikely aina fatratra
Mampomba an-tambitamby ,
Mamy ka tsy foiko
Tsy mahalala sasatra ,
Mpibedy sy mpisangy .

Amiko ny Reny
Mitondra folo volana
Misotro ny tsy tiana .
Tsy haiko hosoloina ,
Mpamaha irony olana .
Mpizara fifaliana .

Amiko ny vady
Afaka manoro
Mitantana ny diako ,
Manolotra ahy fitiavana .
Mafy tsy hikoro !
Dia izay no fifaliako .

Amiko ny zanaka
Manolom-pahendrena
Sy miezaka hanoa ,
Mikendry hamalifaly ,
Mahay manetry tena...
Dia fifaliako koa .

Amiko ny namana
Vonona hifanampy
Tsy miandry valisoa ,
Tsy tia misorontsorona
Milaza ny tsy tanty...,
Dia namana tokoa .

Amiko ny taniko
Dia ny toera-niaviako
Nahazoako fahafahana ,
Nahalatsahan'ny tavoniko ;
Nefa koa mbola hodiako
Nofihinidiko hifaharana .

Amiko ny teniko
Nahatsapako ny sahaza
Sy nahaizako nitia...,
Nibadako hoe: " Dada"
Holalaiko lalandava
Fifaliako ho doria .

Ny Raiko sy ny Reniko
Ny Vadiko , ny Zzanako
Ny Taniko , ny Teniko!
Dradraiko tsy afeniko ;
Lalaiko koa fa tiako
Sy antom-pifaliako .




1991 . MIRA Andriamampianina
--------