VALOVOTAKA (N'Aina)

VALOVOTAKA
(Hira nohenoina teo am-panoratana: Vorona. Barijaona)

"Fa tratra hariva irery an-tanin'olona
Tomany fa te-hody, Ravalovotaka" Malok'ila Erick Manana



Misy irony takariva, manetsika embona sy tsiaro
ho an-dRavalovotaka iny, mamoha alahelo maro
Indrindra rehefa misy kalo, henoina amin'ny teny gasy
Dia manonja tsy ho zàka, ny halavirana an-dafy....

Marina fa be mamiratra, aty an-tany fitadiavana
Marina aza fa matetika, mahazo vaovaon-kavana
Saingy misy tsy ampy lehibe: ny tsapan-tany nihaviana
Ka toa bory tongotra sy elatra, kamboty feno faniriana

Mba hafaliana vetivety, rehefa afaka mivorivory
misakafo gasy indray: ravitoto, patsa mena, voanjobory...
Mankafy sy voky ...fa tsy mba hay tazonina
Dia misaraka malaina, samy hamonjy koninkonina

Marina fa mahavelona, ity tany nanirahana
Marina fa sitrapo indraindray, no nahatonga nivoahana
Nefa misy tsy ampy lehibe: ny tsiron-tany nahaterahana
Ilay tadim-poatra no miantso sa, ny tapa-nisarahana?

Ireto zanaka, taranaka, tsy miteny malagasy
Inona no ilàny izany??? i Dago ho azy no Andafy!
Ny tany maminy aty, ny razam-bovoka tsy fantany
Havakavan-davitra any ve, tokony ho hasandrany???

Marina sy hita maso, aty tanim-pandrosoana
tambazotra, tranonkala, dia io ianao toa manoloana
Saingy misy tsy ampy lehibe: ilay volon-tany fony kely
Ka misento foana indrisy, mipetraka ihany fa voatery


Rehefa mifanena an-dalana dia mifanantsafa ihany
"Hatrizay aho tety...", "ianao ve nandalo tany?"
"Misy fantatro hiainga...", "hanao vakansy, e mba sambatra"
Dia mifanakalo resaka, na dia tsy mifankafantatra

Marina fa misy ny asa, na ny zava-mahaliana
Be koa ny te-ho aty, mitady fomba hihaviana
fa misy tsy ampy lehibe: ny fomban-drazana taloha
Ka na valovotaka aza, ny kibo aty, fa tsy ny fo...

Tsy hoe Angamba fa inoako, io fitia tsy azo afindra!
Sa I Madagasikara kosa, no Tany tena tsara indrindra???
Na mety koa ny Malagasy no tena Tia firenena
Ka ny fiainana an-dafy, ekena fa hameloman-tena

Et cet amour est unique, profondément viscéral
Car ce Pays,je vous le dis, doit être le plus beau de la Terre
Notre coeur y reste, notre âme et essence vitale
Que n'y changera rien, même tout l'or de l'univers
--------