Sary sisa (RAMAMINIRINA Henintsoa Jean Baptiste)

Sary sisa, mipetraka amin'ny rindrina,
Mihantona mangina, manamarika ny fahatsiarovana.
Tsy hita intsony ny tarehy feno hasambarana,
Fotsy sy mainty, mamelona ny fitiavana.

Ny sary teo, nisy tsiky sy fifaliana,
Ankehitriny, foana, misy alahelo ao.
Ny fotoana lasa, toy ny rivotra manidina,
Manjavona, fa ny sary no mitahiry ny zava-nisy teo.

Sary sisa, tsy afaka ho velona intsony,
Fa ny fitadidiana no miboiboika ao am-po.
Mitahiry ny nofinofy, ny fitiavana tony,
Mbola velona, na dia tsy hita maso aza izy ireo.

Na dia sary sisa aza no mitahiry ny fahiny,
Tsy ho lavo ny fiainana, fa hitohy hatrany.
Ny fahatsiarovana no hery sy tanjaka,
Ny sary sisa, ho fahatsiarovana tsy ho levona.

Ramaminirina, 15/01/2025
--------