Embona (Samuël Ratany)

Nantsain'i
(Nalaina tao amin'ny vetso.serasera.org)
Embona
Ho an'i JJ Rabearivelo
Noho ny "Coupe des cendres"

Fa hay ve ny rivo-mandalo dia sahy
Nanaitra tsy satry ny foko natory,
Ka nety nitondra fitserana ho ahy,
Dia tsetra nipongatra tsy hitako akory !

Ny saha fatorian'ny fanadinoana
Dia efa nangina sy ntaolo dia ntaolo,
Fa rakotry ny andom-pisentosentoana,
Tsy misy mpisaina toa vohitra haolo.

Kanefa maninona kosa ary, ho'aho,
Ilay takoperin'ny fo nitadidy
No nety nandefa ny ran'ny talaho
Hitobaka anaty kapoaka mangidy?

Tsaroako va re izany andro fahiny
Izay nampisendaotra fanahy falifaly ?
Ny fasana ve no homeko ny tsiny,
Satria izy ihany no toa nampijaly ?

Satria hofa-tanana tokana monja
No nanakambanany olona iray;
Kinanjo ampidiriny anatin'ny fonja,
Dia fonja hirindrina mandrakizay!

Ny fahafatesana! fantatra ny asany,
Ka moa hahataitra? Mangina e, ry foko!
Ny fahatsiarovana ny havana lasany
Dia mampitambesatra ziogan-toloko.

Atao hoe: mihodina, hono, ny tany;
Ny fiainana, hono, misolo,misolo;
Ny masoko angaha mahadininika izany,
Rehefa misento izy vonto daholo!

Misosa, misosa eny ihany ny taona,
Ka toa tadidy 'lay ora sy daty;
Tomoetra ny fo dia alana ny saona,
Ny fahatsiarovana anefa tsy maty.

Ka ny lokon'ny rahona ve ho jerena,
Ka dia hampisento ny vohon'ny tany;
Na mbola ho fotsy io , na mainty , na mena ,
Lalàna : tsy maintsy manakona ihany !

Samuel Ratany (Ny Mpandinika, lah 123, 2 Avril 1926)
--------
Rohy:
Sokajy : Fiainana
15096 7
Hevitra mandeha
pissoa ( 11/05/2006 07:25)
Isaorana an'i nikopol.
Hametraka hevitra
Midira aloha
Momba ny tononkalo
Mpanoratra : Samuël Ratany
Nampiditra : pissoa
Daty : 11/05/2006 07:25
Antsantononkalo
Nantsain'i
© Eugene Heriniaina - serasera.org 1999 - 2024 - page load 0.0098