You are here: home > Vetso

Namana sy Fahavalo - Frédéric

Mpinamana ny olon-droa
Raha mifampizara izay mahasoa
Ka raha misy ady mafonja
Dia mifampizara sy mifampitondra

Fa mpifahavalo kosa
Raha toa ka mifampifosa
Ka voatsikera avokoa
Na ny aoriana na ny ao aloha

Mpinamana ny olon-droa
Raha tsy manao lolom-po
Mifamonjy raha sendra anaty lavaka
Ka mifampitondra amam-bavaka

Fa mpifahavalo kosa
Raha toa ka mifampidi-trosa
Mifandavo sy mifamingana
Mifamono sy mifandringana

Mpinamana ny olon-droa
Raha mifankatia tokoa
Ka raha misy manavesatra
Dia mifampiteny ,mifampiresaka

Fa mpifahavalo kosa
Raha manana saina votsa
Ka tsy mifananatra ,tsy mifanoro
Fa ny ao an-tsainy dia hifamono

Ny olon-droa mpinamana
Dia mifampizara izay ananana
Ka mifanolotra ny mamy
Tsy mifanadino hatrany hatrany

Fa ny olon-droa mpifahavalo
Dia irony manao toetran-dahalo
Tsy mikendry raha tsy handrava
Mifandramatra ,mifampivazavaza

Ka tsy natao hiara-dalana
Ny mpifahavalo sy ny mpinamana
Ny iray fankahalana
Ny hafa kosa fiarahana

Sokajy : Fifandraisana

Hevitra mandeha

SederaMioty (13/06/2017 21:37:41)

tsara lay tononkalo
marin daolo ny ambarany
mankaSitrak e!

hfrantonah (18/06/2017 11:20:11)

tena zany mitsy!

Hametraka hevitra

Midira aloha