Noho ianao (H.Nirina)

NOHO IANAO
.
Mba manga fibanjina lahy 'zato lanitra
Fialoka tokan'ny andro sy ny alina
Fibanjin'ny tia s'ireo fo manimanina
Mahatonga ny entona ho toa manimanitra
.
Mba mafy fidoboka ny onja any ho any
Mpandrotsy ny fo 'zay vesarin'ny sento
Injany fa reko,toa hafa fitepo
Fa nisy nilaozan'ny tiany hono omaly
.
Hiran'ilay Railovy nandalo
Nahelin'ny rivotra ho tonga tsy satry
Nitsapa ny fery tsy sitrana anaty
Narian'ny saina t'anaty vinany
.
Firedon'apongan'ilay hira Gasy
No tonga nandimby ny tsiaro tsy laitra
Ka indro voatery nihiaka,nanaitra
Nanako ho ren'ny tato sy tatsy
.
'lay afo nandoro ny ala Antsinanana
No tonga nandrangitra ny atin'ny Rova
Tsy hoe fampitaha,f'ireny dia loza
Fa lelakin'ny atin'ny foko:"Fitiavana"
.
H.Nirina
--------