Aza miherika (Heriarilala Andriamamonjy)

AZA MIHERIKA

Meteza ianao hiadana amin'ny fitiavana atolotro
Ilay akanganao izay lasana aloha tsy ho voasoloko
Ny kalokalony taloha tsy hoentiko miangola
Ny ngadontsika roa no 'ndao hiaraha-midola.

Ny anarany fafana tsy hifanosona amiko
Ny diany sasana fa raha tazako tsy tantiko
Ny tepo-poko henoina ho mozika handihizanao
Ny sofiko dontoina amin'ny taralalinao

Dia meteza ianao ho sambatra amin'ny kely izay mba haiko
Mba miezaka aho mianatra izay takatry ny saiko
Izaho tsy safononoka harena amam- pananana
Fa ampoka fitia mahantoka fiadanana

Meteza ianao ho tretrika amin'ny paradisantsika
Aza tia miherika amin'ny tsiaro an'alin-kisa
Ny ankehitriny ianohana, ny ampitso andao homanina
Ny omaly tsy hifantohana fa mahasaro-panina.

Heriarilala 16/02/23 20:52
--------