Feno Hasambarana (Heriarilala Andriamamonjy)

Feno Hasambarana

Feno Hasambarana ny foko tojo anao
Mianoka fiadanana sy faly tsotra izao
An-taona maromaro no naniry anao ho fananana
Nahazo anao ho aro, nahazo anao ho namana.

Izaho ianao tiavina sady efa mitia
Soa fa tsy nolavina fa dia nekeko akia
Mamy sarobidy tsy azo nosandaina
Ianao tena safidy, mamy sy lalaina.

Ho Feno Hasambarana ny fiainanao rehetra
Indraindray ho saro-dalana, mety hisy setrasetra
Fa irariako etoana hoe hihoaranao ny mafy
Raha misy fisentoana dia tsy handresy anao ny rafy.

Feno Hasambarana ny fiainantsika izao
Ampoka fiadanana fa miaraka aminao
Mamy ianao ry tiana ka arovako hatrany
Efa lavi-pijaliana ny fiainako eto androany.

Heriarilala Andriamamonjy 12-11-25
--------