Herintaona (Heriarilala Andriamamonjy)

Herintaona

Nofinofy, sombiniaina
izato ianao hoe herintaona
tadidy foana ilay taraina
tamin'ilay madiva hihaona :
ny kaikaika, tam-balahana,
ny sento sy ny fivavahana.

Vetsovetso, sombiniaina
ilay ianao misangisangy,
tadidy, raikitra ao an-tsaina
ilay tamin'izaho sasa-niandry :
- Mbola ho ela ve, Rasazy ?
- Alefaso f'efa avy.

Faniriana, sombiniaina
ilay ianao hosakambinina,
tadidy ilay niferinaina
Ianao tsy sahiko nofihinina :
"kely loatra sao ho olana
marefo re ka atahorana."

Vetivety, sombiniaina
Dia nitombo ilay ianao
Vatana ary fo sy saina
Isan'andro vaky izao :
toa vaovao isan'ora
ny zavatra hay tsimoramora.

Tsy hay inoana, sombiniaina
izao fiainantsika izao
moa ve takatry ny saina
ny dingana lalovanao ?
Hafakely ianao ry tiako,
tongava taiza, izay no iriko.

Heriarilala Andriamamonjy, 08-11-26
--------