Tsy anao ny ampitso (Heriarilala Andriamamonjy)

TSY ANAO NY AMPITSO
( "Ny fireharehan'ny olona mialoha ny fahasimbana." Ohabolana 18 : 12 a)

Aza misetrasetra amin-drehareha
tsy androany ihany ny fiainana eto ange !
Tsy rahampitso rahateo izato izy no hifarana
Ka avy ianao hidohaka fa vitanao ny lalana !

Aza miedinedina mamboatra ity fandeha !
Ny segondra aorian'izao tsy fantatrao ange !
Tsy anao ny ho avy, ka tandremo ny mirehaka
Modia aloha mamitsaka, aleo mipetrapetraka !

Ekena, nisy ezakao efa hiofo ho fahombiazana
Moa efa azonao antoka ilay tany namafazana ?
Misy hery tsy hita maso mihodinkodina eny
Aleo mikombom-bava, aleo koa tsy miteny

Ny mbola fikasana aza aderadera
Ny hafa aza esoina raha hitanao tavela
Rehefa tena hitanao hoe tapitra ny ady
Izay vao mihoraha fa tsy izao sahady

Ka aza mihetraketraka amin'ny mbola miady mafy
Ny anao mbola tsy mazava fa vao mangiran-dratsy
Tsy anao ny ampitso, tsy hay ny zavatra koboniny
Ka mamitsaha aloha, fa aza mila tonony.

Heriarilala Andriamamonjy 10 novambra 16:57
--------