Inty mitady anao (Le Myosotis)

Mbola inty mitady anao eny an-dalam-pahantrana
sy eny an-tsisin-dranomaso sy eny amorona nombàna
ilay notiavinao fahiny, ‘lay malalanao ihany,
nefa tojo rendrarendra ary randram-bao nandalo,
ka nirosoroso foana eny an-dalam-pahavalo
feno latsa sy tomany.

Mbola injao mamelovelo eto an’eritro fihinina
‘lay indray mamaton’alina, ‘lay harivam-bolantsinana;
mbola injao manonjanonja ilay angolako fahiny
fony isika niombon-day, fony isika nilalao
teny an’alina mangina feno tononkalo vao
ary antsam-pivahiny.

Toa manotohoto loatra ity endriko mahory,
‘zato embona aman-tsiahy ‘zay to’ tsy miantra akory;
mbola injao mitanjozotra ‘zato alahelo anao,
ary ny hanina ao anaty dia indrisy ka indrisy !
Fa manongotsongo loatra ity foko ‘zay tsy misy
mba mangoraka akory.

Mbola injao mamolivoly sy mamerina ako loatra
ato am-poko malahelo ‘rony kalo tetsy ankoatran’
itsy tendro malomaloka, sady toa dia malahelo
‘rony hitsa-tongotrao ‘zay nataony tsilalao,
fony isika nomba teny, fony izaho nitady anao
tamin’ny oram-belovelo.

Manantena sady miandry ‘rony endrikao hatrany
ity masoko mahatram-pisentoana sy tomany,
‘zay toa malahelo loatra itsy lala-niarahana
tamin’ilay harivarivam-bolantsina-mamanala.
… Ilay maditranao no miantso ka faingana, ry malala
mivimbina fangorahana.

LE MYOSOTIS
Takelaka Notsongaina p.40
--------