Miandry anao (Mandrantosoa LeProf)

Tena miandry fatratra ny fahatongavanao ny eto ankehitriny.
Ny reninao moa io efa tena tsindrin-daona fa tapitra vidiny
Izay zavatra mba tazany eny rehetra eny,
ka hoe an-jazakely.

Omaly izao zahay dia nitety magazay tetsy sy teroa,
Dia mbola tsy afa-po;
Fa androany indray, nanokatra finday, dia nisavasava tao
anaty fesiboky, nijery akanjonao.

Ny ato an-trano moa, isak'izay miteny, isan'andro izao;
Na inona na inona votoatin-dresaka, tafiditra ao ianao.
He moa zany hafaliako rehefa injao i Neny miantso ka miteny:
"Avia ianao aty, jereo anie izy io e, tsapao fa mihetsiketsika"
Dia ampiany kely hoe "Efa tena pelika ann"??
Dia iny aho fa mitsapa, miandry anao itsipaka,
F'ianao mody mifitsaka,
Mamilafila kely...

Hitako sahady fa ho feno sangisangy ny fiainantsika mianaka.
Ho fifaliana foana, tsikitsiky lava, fitia miraradraraka.
Ianao sy i Neny moa efa azoko antoka fa tena ho mpinamana,
Hifankahazo am-po, dia tena hiray saina, ho ampoka hasambarana.

Fa tena mba iriko, tena antom-bavako isan'andro vaky:
"Ny fisianao anie ho tady mahazaka ka tena hanamafy
Ny fifamatorana misy eo aminay (mivady)
Ka hampiredareda ilay afo mahamay, ilay fitia nampifandray"

Eny e, izay no ela, fa izao no tiako ambara,
Tongava am'zay e, tongava f'aza tara.
Tadidinao lay teniko tany am-boalohany iny?
Tena miandry fatratra ny fahatongavanao ny eto ankehitriny

27_04_2022
--------