NOFIKO HONO (Mitohy) (lifanir)

Nofiko hono indray alina, andro vitsy lasa izay
nisy toerana tsy fantatro nahitako anao indray
Singan-drery toa variana teo an-tsisin'ny kamory
lasan'embona aok'izany tsy nahatazan'Ahy akory

Izaho tsy sahy nanabataba fa nandinika nijery
Namonjy takotakona aza ka nisitrika niery
Nanara-maso teny ho eny fa toa tsy sahy niseho
namantatra mangina izay mba nahatonga anao teo

Dia indro ianao fa tazako nioty voninkazo iray
Avy eo dia naka toerana malalaka teo an-tsisin-drano iray
nolalaovinao ny felany, nopotehinao ny vony
ny maha-voninkazo azy toa tsy fantatra intsony

Avy eo dia natsipinao teo ambony alon-drano
Ny masonao mijery toa tazako manganohano
Hita soritra avy hatrany tamin'ny endrikao ry tiana
ny adin-tsaina amam-panahy vokatry ny hakiviana

Dia niondrika ianao toa tena latsaka tomany
izaho nitsinjo teny ho eny aza, mba oriory aok'izany
dia namoaka sento lalina, toa namohafoha tsiahy
Fa maninona ary ianao, fa dia nahoana loatra lahy ?

Tampoka, tafatsangana ianao tena vonona ny hanainga
ndeha hamonjy ilay tanàna any ambadiky ny bainga
Teo aho vao tapa-kevitra ka niantso anao hiverina
nanonona ny anaranao, nanontany hoe : Aterina ?!

Dia nitodika ianao, tsy nahafantatra ka nianjona
Raha vao nahita ahy anefa dia gagagaga sy talanjona
Segondra vitsy monja, niova ho azy teo ilay endrika
Tsiky no navalinao sady tsiky tena mendrika

Gaga ianao ka ny anarako no voatonona tsy nahy
tsy nisalasala akory, tamy ndeha hanatona ahy
Dia niontana ny foko raha vao nandre ilay feo
indrisy, taitra aho ka 'ty tafarina, nefa inona no teo !

Hay nofinofy ihany, nofy mamy sady fohy
Tena tiako raha miverina, tena tiako raha mitohy
Saingy indrisy tsy nimpody, ny torimaso koa tsy tamy
hany hery nitakoko nandinika ilay nofy mamy

Eto an-tranobongokeliko, etý ambanivohitray
no hamerenako tsiahy izay lasa rehetra izay
eto anivon'ny alin-tony feno kintana tomaratra
no mitraho ny ranomasoko toy ny ranon'orambaratra

Eto am-baravarakely aho no mitazana any ho any
mamisavisa izay ho diavina sy mandefa ny vinany
maka sary an-tsaina irery, malahelo oriory
ka na misasak'alina aza mbola tsy mahita tory

Ataoko sorona ho anao ny torimasoko androany
ka ny eritreritro rehetra no alefako mankany
hamoha anao eo am-pandriana toy ny mifanatri-tava
hilazako ny alahelo sy ny sento tsy misava

Fa ilay fitia izay nokoloiko, vao nitsiry dia voarosa
ny fikasana nandrandraiko tena rava tsy tontosa
Fahoriana tsy hita lany no misoritr'eny an-tavako
Asanao ry fandaharana, mosarena ny Fitiavako !

Hasambarana voafetra, eny toa fitia voarara
Izay no lahatra ho antsika, izany ve no hoe Anjara?
Hatraiza anefa moa izany, ary koa mba rahoviana
no mba ho tony ato anatiko ilay fitiavan-tsy mangina

Tamin'iny lalana iny, hira ihany mantsy izany
nahitako fahoriana tany am-piandohana tany
mbola tafaverina eto, tamin'iny lalana iny
ianao no malala, aiza izany ankehitriny ?

Satriko aza ianao raha miantso hoe : avia
Satria ny Foko lasanao dia tena mbola tia
satriko aza izany na dia izao anio izao
Fa ny foko tsy mitony tena mbola tia Anao

Indrisy anefa fa ny olana toa tena sarotsarotra vahana
toa tsy hita izay hizorana, toa tsy hita izay hombana
Fa ilay noheveriko ho fanilo toa zary haizim-pito sosona
ilay masoandro nantenaiko feno raho-mitakosona

Nefa, inona ny vokatra mety azo ho antenaina?
Rehefa tonga ny mazava, ho vimbinin'ny maraina
Inoako etoana anefa fa mbola hisy ny mazava
Fa Ilay Zanahary ao ambony no antsoiko lalandava.

Hisaraka eto aloha isika, tsy hay izay mbola hihaonana
Io fitiavantsika io, ampiakanjoy fisaonana
Ireny sarintsika ireny sy ny andro sarobidiny
ampirimo tsy ho tazana fandrao mandratra Fo tsy fidiny

Ny zavatrao atý amiko, tsy ho very sanatria
fa aoka aloha mba hindramiko hanomanako ny dia
Lalan-davitra tsy fantatro mantsy no ho diaviko atsy ho atsy
ka manahy ny mangirana aho fandrao ho lany vatsy

Rehefa tody soa aman-tsara aho manoratra ho anao
Mandefa ny adiresiko any... sy milaza vaovao
Ity tononkalo ity tandremo tsara tsy ho very
Fa avalony dia ampirino, aza dia atao tsianjery

Fahatsiarovana tsy veriko ilay sora-tananao
Ataoko raki-tsarobidy izay voasoratrao ao
Koa aza kivy anefa fa any volana, any taona
Mivavaha ho ahy fa tsy maintsy mbola hihaona.

Andro maloka izao no eo amin'ny fiainantsika
Tsy ahitana hafanana, fa mamanala mangatsiaka
Aiza anefa no ahitana fanàfana mahery vaika
Fa izany no iriko, izany koa no ilaiko maika

Soa fa nisy tsiky farany izay navelanao ho anjarako
Hampahery ny fanahiko, hanatsara ny tantarako
Soa fa nisy Zanahary mbola azoko itokiana
Hanasitrana ny ratra nampitondra fahoriana.

Asa lahy raha mba ho tratrako ilay andro nanafarana
Fa hiezaka ihany aho aloha raha azo anoharana
Aza omena tsiny fa izao no fandaharana
Fa mirary anao ho soa sy hahita fahasambarana

Eny soava dia ianao, tsofin-drano mahereza
Fa hanampy anao am-bavaka aho eny an-dalana mideza
Raha sendra manimanina Ahy tonony mora ny anarako
Fa izaho aty hivetso irery miaraka amin'ny Gitarako.

Farany, etsy kely mitsikia, mahereza matokia
Atanjaho ny eritreritra fa mbola lavitra ny dia
hamorony lohateny io adirimakeliko io
hanoratako amim-pitiavana, atolotro amin'ny Fo madio.



lifanir@yahoo.fr
--------