ANDRO FAMPAKARANA (Mihaja Harilanto)

Niakatra ny lapa tamin'izay andro izay
Andro nanamarika ny fiainako rehetra
Fa tonga ny fotoana nanamasinan'ny Ray
Tantara tsy adino fa voarakitra mitoetra

Tao anaty vavaka sy fo torotoro
No nandraisana ny hosotra
Rakotra hafaliana tamin'ny fo manontolo
Fa vita fanekena sady tsara fototra

Mbola tadidiko eto...
Fa vonton-dranomaso raha nanolotra ny peratra
Tomanim-pifaliana tao anaty sentoseto
Nifamihina avy eo fa antsika moa ny sehatra
Dia nifaly sy niravo...

Isaorana ny avo fa feno fahasoavana
Henika tso-drano sy teny fikasana
Dia averiko eto anio r'ilay tokana notiavina
Fa tiako loatra ianao ho fenoiko fanajana
Mandrakizay...

Mpanoratra : Mihaja Harilanto
"Ny aiko manoratra, ny tononkalo no aingam-panahiko"
--------