Mba lalina loatra (Rafanoharana, Bolespara)

Mba lalina loatra ny zava-mahazo
Anay vehivavy hiraina an-gazety ;
Raha ahitra manko 'zahay dia halazo,
Ho maina, ho maty, ho lo vetivety !

Na olon-dehibe na zaza, tanora,
Dia samy miteny, manao aok'izany !
Vehivavy ! Vehivavy ! O ! tena fatsora ;
Ny zanak'i Eva mandoto ny tany !

Kanefa ;

Mba iza 'reo olona tia jorojoro,
Manao saron-doha, toa tena "manavy",
Akaikin-tamboho, tamboho mikoro ;
Mba iza ? Moa dia vehivavy ?

Mba iza 'reo sahy manao teny tsara
Milaza fitiavana tokana ihany ?
Dia 'njao fa miventy "Ianao no anjara !"
Kinanjo handoto no hevitr'izany.

Mba iza 'reo sahy manao pi-maso
Na anaty vahoaka na an-toera-mangina,
Tsy menatra akory miantso "andraso"
Sy misakan-dalana ery am-piviliana !

Mba iza 'reo dia alim-pody mazàna,
Dia ireo izay miala ho "be raharaha"
Kinanjo misotro, miloka igagana ?
Mba zovy zareo ? ... Lazao, iza angaha ?

Raha izany sy izany no izy, hevero :
Ny faharatsiana iombonana ihany
Koa aza dia kanto hanolotra afero
Fa sarotra iainana anie eto an-tany !

Hatramin'ny anio samia e ! Hendry
Na lahy na vavy. Koa amin'ny sisa
Ny fahatsarana anie no ho voakendry
Dia hiova ny tany ! eny ho "PARADISA" !

Bolespara - Antsirabe 17 septambra 1926
--------