Adin-tsaina (RAMAMINIRINA Henintsoa Jean Baptiste)

Adin-tsaina isan’ora
No iainako eto an-tany
Ka misoko moramora
Ireo hakiviana sesilany

Adin-tsaina mivangongo
Amin’ity trano bongo
Tsy mba misy mijery sy mihantra
Satria ve olona mahantra?

Adin-tsaina lalandava
Mandrakotra ny androm-piainana
Ka tsy mba misy andro mazava
Hitadiavan’olona hitarainana

Adin-tsaina mamparary
Ka zara raha mahatelim-bary
Fa vokin’ny adin-tsaina
Na ariva na maraina

Adin-tsaina tena mafy
Nefa mbola ilaozanao migafy
Amin’ny teny mandratra sy feno fosa
Amin’ity olona malemy sady efa osa

Adin-tsaina mitambesatra
No mibahana ao anaty loha
Vavanao anefa toy ny karetsaka
Ka ny heriko rehetra, voahidy avokoa

Adin-tsaina mampangirifiry
Toy ny ratra nipipizana
Sy latsaka an-davaka mankadiry
Nefa mbola hosenao sy handihizana

Adin-tsaina mandramaty angamba
No tianao hiainako
Dia hifono voro-damba
Ny fo amam-panahy sy ny tenako

Ymamiah 11/06/2023
--------