MIVERINA ETO INY (RANÖE)

Hahatsiaro ianao hahatsiaro
Hitafa ianao ka hitafa
Fa ny tafantsika roa
Tsy mba fantatr’olo-maro
Tsy mba hain’olon-kafa.

Hiteny ianao hiteny
Hitady ka hitady
Fa ny nofintsika roa
Ilay nanjeny teny ho eny
Dia zava-tsaro-pady.

Hijery ianao hijery
Hahatsiaro ka hahatsiaro
Fa ny sarobidintsika
ilay ahy sy anao irery
tsy azon’iza hafangaro.

Lasa ianao ka lasa
Hitia ka tena tia
Fa ilay lasantsika iny
ireo zava-nokinasa
Tsy ho hadino sanatria.

Any andro iray
Hitady ahy ianao !
Fa izaho….. tsy ho eo intsony.
--------