FIAINANA (Safo siaka)

Pas encore lu

Demander une lecture
(Nalaina tao amin'ny vetso.serasera.org)
Ny fiainana anefa miroso mankany,
Mizotra mizotra amin'izay hitodiany,
Mifangaroharo ny ngidy sy mamy,
Toavina foana amin-javatra tiany.

Mbetika mirana ianao, falifaly
Fa sendra ny zavatra ela nirina;
Tampoka indray tambesaran'ny jaly,
Mamoy 'zay tsy foy mba nokajikajina.

Ny fiainana anefa tsy miandry na miato,
Miridana lava, manasatra foana.
Ataovy ny kajy fa folo amin'ny zato
No hany mba tony ny zara fotoana.

Raha mianatra ianao: hazakazaka lava,
Manenjika an'itsy, mamonjy an'izatsy;
Raha miasa: mikendry ny hohanin'ny vava,
Manomban-tahiry, mandrefy ny vatsy.

Ny fiainana kosa tsy fiainana akory
Raha mamy tsy miova no tsapa eto an-tany,
Tsy ngidy mafaitra doria mampahory
Fa fangaron-tsiky aman-kiakan-tomany.

Safo siaka
--------
Lien:
Catégorie : Fampaherezana - fiainana
945 0
Ajouter un commentaire
Veuillez vous connecter
A propos
Auteur : Safo siaka
Inséré par : Safosiaka
Date : 08/03/2015 14:05
Lectures

Pas encore lu

Demander une lecture Ajouter audio
© Eugene Heriniaina - serasera.org 1999 - 2024 - page load 0.0141