ASA RE! (Tinah mahefahaja)

Asa re! Oviana vao hilamina
Zato ady pilitiaka tsy andro tsy alina
Fa efa mahantra sy sahirana
Mitady izay mahatoky mba hifikirana

Asa re! Inona no hitranga
Raha ny tsolotra foana no harangaranga
Hibahanan'ireo fitaka sy lainga
Na eny ambony latabatra na mpamadi-bainga

Asa re! Firy no ahatsapa tena
Rahefa fongana ireo harem-pirenena
Efa trotraky ny aditsaina sy hila ho vaky loha
Vao mody hilaza hoe :"diso tokoa!"

Asa re! Hatraiza izato fianarana
No omena ireto ankizy tsy ampy fananarana
Mba avaratra ihany nefa ambany fisainana
Mirefarefa @ tany sy mamotika fiainana

Asa re! Ho aiza ity fandrosoana?
No mahazo vahana sy mahabe finoana
Ka dia nampiova tanteraka an' iMadagasikara
Ka zary tsy mino ny lahatra sy anjara

Asa re! Fa nahoana mihitsy
Ny zanak'olombelona no tsy mitsitsy
Fa toa zary manao fiainambimby
Mampiana-dratsy ny fara sy dimby.
--------