HANDEVINA NY NISY (Fredy Jaofera)
Mbola tsisy niantsa
(Nalaina tao amin'ny vetso.serasera.org)
HANDEVINA NY NISYHandevina ny nisy no sisa ato an-tsaiko
hampionona ny tena, ry hany nantenaiko,
hampiravo itony dia mba hihira sesilany,
hanova ny lasa tsy ho sento sy tomany.
Handevina ny nisy no tarigetra izay natao
hanala ao an-doha tsy hahatsiaro eto anao,
hamotika ny teny izay nataoko tsy handalo
kinanjo nefa ity mbola tonga mampimalo.
Handevina ny nisy no mamorina ny hoaviko
hampiroborobo ery 'zay rehetra notadiaviko,
hametraka ho tantara 'reo efa vato fehizoro
ambara ankehitriny fa mihalefy sy mikoro !
Handevina ny nisy no fanadino ireo taloha :
ireo fotoana maromaro nahafinaritra tokoa,
ireo sangisangy mamy mbola feno faniriana
kinanjo nefa anio voatery hoe : « Nariana ».
Fredy JAOFERA
--------
Rohy:
