IRAY ISIKA FA TSY ROA (Fredy Jaofera)

IRAY ISIKA FA TSY ROA


'Reny fifaliana maromaro,
'reny ranomaso nifangaro,
nahatonga ahy teto an-tany
mba ho anao irery ihany.

'Reny fotoana nifanesy
nampisento, nampandresy,
no nilaza fa any am-para,
mbola ianao no mba anjara.

Ka na eo ny elanelana
tsaroako tsy azo ferana
dia iray isika fa tsy roa :
iray fanahy !...Iray fo.

Ny Lasa foana no mimalo,
ny ora foana no mandalo
fa raha mbola hoe : sariaka,
tsy hitsonika ny ISIKA.

Ny tany foana no mihodina,
ampiarahako amin'ny sodina
fa ny ISIKA dia mbola IRAY
ho doria !...Mandrakizay !...


Fredy JAOFERA
--------