MAIVANA (Fredy Jaofera)

MAIVANA






Na feno aza ange ireo voninkazo tsara
eny an-jaridaina mba kanto sy voarara,
hameno ny hafaliana mbola tsy handao,
ho maivana raha tsy eo mihitsy ianao.




Na tobaka aza ange ireo vorona mihira
manala fahanginana sy tsy maniratsira
ho namako eto ombieny sy tsy hita fetra,
ho maivana raha tsy eo ianao mitoetra.
.



Na bobaka aza ange ireo mitsidika eto
manao izay tiana ka tsarovy na raketo,
afa-hampiala voly sy hanome fiadanana,
ho maivana raha tsy eo ianao ananana.
.



Na tototra aza ange ireo lalao tokoa
manala sorisory sy tsy hampamohafoha
ny fahiny izay mamerimberina ny jaly,
ho maivana raha tsy eo ianao mifaly.





Fredy JAOFERA
--------