TSETSATSETSA (Fredy Jaofera)

TSETSATSETSA





Rehefa izaho no manan-dreny
tsy handratra ahy lavareny
ka manaiky hiombom-po
rehefa mafy ny manjo ;
manaiky hiray saina
rehefa voa sy maina ;
manaiky hiray fanahy
rehefa tototra ahiahy,
dia inoako ho hasambarana
no ho hita sy hisantarana.




Rehefa izaho no manan-dreny
tsy handentika ahy ombieny,
ka vonona hiara-dia
sy hamboraka fitia ;
vonona hiray tigetra
hamotika ny tsetra ;
vonona hiray safidy
ho harena sarobidy,
dia inoako ho fahasoavana
no hipoitra tomandavana.




Rehefa izaho no manan-dreny
tsy hanakana ahy hankeny...
Ka mahazo ny hakiviako
sy ny ora nijaliako ;
mahazo ny hetahetako
sy ny taona niaretako ;
mahalala ny alaheloko
sy izay tsiambarateloko,
dia inoako ho fandresena
no hirotsaka sy handena.






Fredy JAOFERA
--------