IZA MOA IZY INY ? (Fredy Jaofera)

IZA MOA IZY INY ?




Tsy fantatro avy akory,
na ny anaranao na ny momba anao
fa nampidoboka ny foko :
ny fijerinao malefaka,
ny bikanao tsy ratsy,
ny tsikinao niserana.



Tsy fantatro avy akory
na ny adiresy na ny zavatra rehetra
fa mibahana ato an-tsaiko
ny hoe : « Iza moa izy iny ? »
« Ary moa ve tsapany
izay zavatra mba tsapako ? »



Tsy fantatro avy akory,
na efa manan-tompo na mbola mitady
ka natao hiara-dia
hifono ilay safidy,
hizoran'ito lahatra
avy amin'ilay Nahary.




Fredy JAOFERA
ANTANANARIVO, Sabotsy 23 Aogositra 1986
--------