Ny anton'ito fiainana (Mandrantosoa LeProf)

Matetika andalovana ny tena zava-tsarotra,
Zava-manahirana mahatonga asa saina ;
Dia iny ianao mandinika, toa te hiady varotra,
Mahateny mihitsy fa mangidy hay ny miaina.

Variana ianao mijery ny atsy ambadika milamina,
Ny vola, ny harena, mitobaka aok'izany.
Ianao anefa ity anaty fahantrana lalina,
Na hanina indraim-bava efa tsisy hatry ny omaly.

Oh, ny atsy atsimo mikorana, falifaly,
Ry zareo atsy avaratra mihira sy mandihy.
Dia hiteny ve ianao fa tena tsisy raha manjary,
Manorisory loatra 'ty fiainana eto ity ?

Lazaiko anao androany ny anton'ito fiainana :
"Ezaka sy tolona raha toa ka te hivoatra".
Ny olona efa tafa angaha moa hita hitarainana ?
Angony ny herin-tsaina, mitsangàna, ndeha mihoitra.

Fa etsy kely aloha, aza dia miady irery,
Ankoatra ny fahaizana sy ny herinao malia ;
Ataovy lohalaharana ny VAVAKA ho hery.
Mitafia finoana...
Fa homba anao tokoa anie JESOA KRISTY.
--------