MBOLA (Ny Antara ANDRIANARISAINA)

Mbola tonga ianao hamoha ny lasa efa mandry
izay efa difotry ny alahelo vao tsy ela akory izay;
Avy mifongatra mivoaka tsisy mpihady
ny alahelo efa nanolatra ka tonga ratra indray.

Mbola tonga ianao handatsa ny lavo efa nanarina,
na kiry sady hambo aza no nirisihany hiady;
Kinanjo izy potraka sy lavo ary mila tsy ho tafarina
noho ny hetraketraka nihatra sy ny efa koa nianjady.

Fa mbola ho tsapanao 'zany hoe: esom-paharesena,
Fa anio aloha mihobia! aza mihevitra akory!
Fa mbola ho tsapanao ihany izany tsindriazolena
hampiarin-dreo tsy vanona amin'ny olona efa ory...
--------